Polo mantemento do Noitebús

Sr. Presidente da Xunta:

 As persoas asinantes deste texto entendemos que o servizo do Noitebús é unha iniciativa de prevención de sinistros de tráfico durante o desprazamento da xente nova aos lugares nocturnos de diversión. O éxito deste servizo é obxectivamente constatable en canto á diminución deste tipo de sinistros. Tamén o é en número de usuarios, e en informes de distintos organismos e entidades tais como a Dirección Xeral de Tráfico ou a asociación STOP accidentes. A supresión deste servizo é moi negativa para a xente nova, e mais na Costa da Morte, onde por desgraza, foron notorios os accidentes de tráfico, durante o desprazamento de mozas e mozos aos lugares de lecer nocturno. Non serve o argumento dos recortes orzamentarios diante da crise económica, pois este servizo é básico e prioritario. Máis custan outras iniciativas non prioritarias, e non só non se reducen, senón que mesmo se promocionan. Nós temos moi claro que o Noitebús salva vidas,e a súa supresión non. Por todo isto SOLICITAMOS Que se manteña o funcionamento do servizo de transporte público nocturno a lugares de lecer (Noitebus), sen aplicar ningunha redución das rutas existentes e mellorando a súa dotación e funcionamento no conxunto do territorio galego.